Magpa-commission muna

Larawan ng mga sundalo habang naghahanda para sa C130 loading. (US Navy Photo)

Pagkatapos ng aming Test Mission sa Sirawai, Zamboanga del Norte noong August 1995, kami ay sinundo ng C130 Plane upang ibalik sa headquarters ng First Scout Ranger Regiment para sa aming graduation ceremonies.

Excited ang lahat habang kami ay pumipila para sa loading namin sa eroplano. Isang tigasing non-commissioned officer (NCO) ng Philippine Air Force na si Sgt Botyok ang nag-asikaso sa amin at nag-supervise sa aming formation sa labas ng eroplano.

"Gentlemen, I am Sgt Botyok, your load master. Para maayos ang ating loading dapat ay organized tayo pati ang inyong kagamitan,"sabi nya.

Nakita ni Sgt Botyok na panay gusgusin kami at walang rank insignia sa uniporme ngunit batid nya na merong mga opisyal sa amin. 

"Ganito ang gagawin natin, ang lahat na mga opisyal ay dito mag form sa aking kanan. Ang mga enlisted personnel ay dito sa aking kaliwa."

 

Sumunod naman kami sa kanyang instructions at pumila ng maayos dala-dala ang aming combat packs.

Si Lt Boloy na aking classmate ay payatot at sobrang gusgusin at tila tambay kanto ang porma dahil sa matagal na panahong pagtitiis sa pag-ulam ng sardinas sa bundok. Dahil sya ang pinakamaliit sa grupo ng mga opisyal ay sa harap sya pumila.

Nakita sya ni Sgt Botyok at agad na sinita habang nanlilisik ang mga mata.

"Hoy ikaw damuho magpa-commission ka muna bago ka humalo sa mga matitikas na opisyal!"

Na-shock si Lt Boloy at di nakapagsalita. Ni-rescue namin sya at halos nag-chorus na sumagot:

"Opisyal yan Sergeant, mistah namin yan!"

Nag-blush si Sgt Botyok. Napahiya rin sya. Ito lang ang ang kanyang nasambit: 

"Ayyyyyyy sorry sir!"