Ang tuba sa Sirawai

Noong July 1995, napasabak sa isang engkwentro ang  Scout Ranger Course Class 121 na aking kinabilangan, sa kagubatan ng Sipaket-Panabutan Complex, Sirawai, Zamboanga del Norte.

Nakasagupa ng aming hanay ang mga kaaway na humigit kumulang 50 bandidong kasapi sa hanay ni Kumander Aguila. Kasama ang grupong ito sa umatake at nagsunog sa bayan ng Ipil noong April 1995.

 

Matindi ang palitan ng putok ng magkabilang panig na tumagal ng halos isang oras. Umuulan ng M203 high explosive rounds.

 

Habang nag-aayos ng nag-jam na M60 GPMG ang isa sa aming classmate ay tinamaan sya sa ulo at namatay. Dalawa rin sa aming classmates ang tinamaan sa paa.

 

Dahil malalakas kami at preparado sa mahabang training, karipaspas ang aming pag-maneuver sa mga vantage positions upang malamangan ang mga kalaban.

 

Gusto naming lahat na managumpay sa aming combat mission dahil requirement ito upang makatapos kami  sa Scout Ranger Course.

 

Sa gitna ng putukan naririnig ang dumadagundong na boses ng opisyal naming classmate: "Team 1 covering fire, Team 2, Assault!"

 

Mabilis pa sa alas-kuwatro ang takbuhan habang tuloy-tuloy ang putok. Merong mga combat packs na naiwan ang mga bandido, pati armas at mga plastic containers.

 

Binitbit ng isang Ranger ang kanyang war booty na namumulang galon  at ipinakita sa kanyang Team Leader habang nakangisi: "Uy tuba, yeheeeeeey!"

 

Nanlaki ang mata ng lahat sa 'tuba' na dinala ng kasama. Meron itong karugtong na electric wire at di alam nasaan ang kabilang dulo na maaaring nandon ang triggering device.

 

Parang nakakita ng multo, nag-chorus ang tatlong Rangers sa pagsigaw: "Pu**ang ina! Bombaaaaaaaaaaaa!"

 

Sa isang iglap, nagsipaglaho ang lahat na nasa paligid ng inakalang tuba.

 

Hindi naman ito sumabog kasi hindi nai-connect ng bandido ang battery.

 

Nagtutulakan ang lahat kung sino ang mag-deactivate ng bomba.

 

Naka-graduate naman kami lahat na nagsurvive sa aming Test Mission at nagka-kantyawan sa aming karanasan.

 

Ang aming 'bartek' (lasenggero) na classmate ay tinawag naming si "Boy Tuba".